|
|
|
|
| >> Di Musigg |
| >> zur hochdeutschen Version |
| >> zum ultimativen Fränkisch-Kurs |
|
Eingli heer i ja di verschiednsdn Ådn vo Musigg. Dou is ämol ä glanner Ieberbligg ieber ä bår Schdationer in meim Lem, däi wou mi in Sachn Musigg brähchd hom. |
|
1989: Grubbn wäi di "Mastermixers", "Technotronic" (Pump Up The Jam), "Mysterious Art" (Das Omen) und "Culture Beat" (Der Erdbeermund) homm än Vurgschmagg affm Drend vo di neinzger Jåhr gehm: DJ-Kult und bsonders Dechno / elegdronische Musigg. . |
|
1990: Mei ersde MIDI-Broduggzion mid anner Casio-Orgl, däi wou an än ATARI-Heimcombjuhder ohgschlossn wår. Väier (!) Schburn konnd i gedrennd vonnernander eischbülln und mid dem Brogramm "Steinberg Twelve" arrangschiern. Nu dazou wår i Åhnhänger vo dä Grubbn "EAV". |
|
Ånfang dä 90er Jåhr: Dou wår i hald wäi vüll Jungdliche affn Dancefloor-Dribb, den fier miech di Grubbn "Snap" (Rhythm Is A Dancer) begründ hodd. Andre Acts vo derer Szene wårn "DJ BoBo", "Culture Beat" (Mr. Vain, Anything), "Dr. Alban", "Haddaway", "Captain Hollywood Project" und su weider ... Däi Musigg wår fier miech so zu sång di Einschdiegsdroge fier Dechno. . |
|
1994: Dou hobb i "The Prodigy", "Mark Oh", "Marusha" (däi Fra mid denni gräiner Aungbraun), "RMB" und "Perplexer" ganz doll gfundn. In demm Jåhr is der ATARI nausgfluhng, und es is ä 486er DX 66 (66 MHz Daggdfregwenz) mit 16 (sechzehr) Bit Saundkaddn ångschaffd worn. . |
|
ab 1995: Zu derer Zeid hobb i mei Heim-MIDI-Schdudio mid anner neier Windows-kombadiblen Software erweiderd: Di Brogramme "Creative Wave Studio" und Steinbergs "Cubasis". Däi Brogramme benutz i dalweis bis heid, walls sehr anwenderfreindli sin. Nu dazou wår i Åhnhänger vo dä Rådiosendung "N1-House-Special" (ab 97 hodds "N1 House-Night" g'hassn) mid di DJs Pee Majors und Harald. . |
|
1996: Dou hodds mi dann aff di Raves im Erlanger "Tanztempel" mid DJane Miss Distess X zuhng. Iech hobb mer beim Thomann in Treppendorf ä richdich goude Orgl kaffd (Alesis QS 6, 64-schdimmich polyphon, mid 2 MB Sample-Flash-RAM-Kaddn). Endlich konnd i di sechzer MIDI-Schburn, schdadds di bisheriggn väier, mid allem drum und dran ausnutzn. Dechno und House wår dåmålz mei Lieblingsmusigg: Acts wäi "Future Breeze" und ganz bsondersd "Robert Miles" (Children) hom meine Broduggzioner inschbirierd. Zu derer Zeid begann ah däi Disco-House-Sache ganz grouß zu wern, su dass i mer glei die Originåle vo "Chic", "Sister Sledge", "Diana Ross" und "Kool And The Gang" kaffd hob. . |
|
1997: Vocal-House, Dechno, Soul-Funk wår weiderhin meins, nu derzou hobbi psychedelischn Rock ass di Sechzger und Sibbzger (Wishbone Ash) enddeggt. Ah hobb i Drum'n'Bass enddeggt. Am 18.1.97 is di Cobroduggzion mid am Freind under dem Nåmer "Mad Plasma" (Diddel: "Breakthrough To A New Dimension") im "N1-Techno-Club" gsend worn. . |
|
ab 1999: In der MIDI-Broduggzion hob i öfders Samples mid der Software "Cool Edit" verwoschd. Däi Software bied di Möglichkeid, neem väschiedner Equalizer und Effegtgeneradorn, den Sample zu "timestretchen", allzo mer lässd di Donhäih su wäis is, blouß di Ablaufzeid doud mer verändern, und zu "pitchshiften", wos hassd, dass mer bei gleichbliemner Gschwindichkeid die Donhäih veränderd. Nu dazou hob i scho seid einicher Zeid Britpop ("Oasis", "The Verve") und di Hamburcher Scholl ("Tocotronic" mid dä Bladdn "K.O.O.K" und ganz bsondersd "Die Sterne"). Di Hoyer-Bassgidarrn vo meim Vadder hobb i ass der verschdabbdn Eggn kulld und hobb des Spülln glernd. . |
|
ab 2000: Drum'n'Bass und NuJazz, weiderhin Disco House, Soul-Funk, Britpop ("Supergrass"). Nu dazou hobb i ersde Bänderfahrungen allz Basser gmachd. Allz DJ-Act mou i "LTJ Bukem" nenner. . |
|
2002/2003: Aff Rådio Z hobb i di Soul-Funk-Disco-Sendung "Chocolate Ciy" mid DJ Ingo enddeggt. Tocotronic hom di Bladdn "Tocotronic" nausbrachd, däi wou iech allerdings ned su goud wäi "K.O.O.K" find und Supergrass hom midder CD "Life On Other Planets" glänzd. 2002 bin i zum ersdn Mål aff's Nämbercher Musiggfestival "Rock im Park" ganga und hobb mer Lenny Kravitz, Santana, Jamiroquai, Tocotronic, Bush, Faithless, Michael Mittermaier, Readymade und andere ånkörd. In dä MIDI-Musiggbroduggzion hobb i mi vom Thriller-Film "Ruang Talok 69" inschbiriern lassn und hobb draff den am Stil dä Sechzger ånglehndn Drägg "Farang" gschaffm. Dieser Drägg hod den Abschluss vo mam fümfdn Album "Turn Around" bild. Underm Brojeggdnåmer "Project Chris & Ackivision" hobb i ab 2003 Drum'n'Bass Dräggs in Co-Broduggzion g'mixd. . |
|
2004-2007: Am Ånfang vom Jåhr 2005 hobb i mei MIDI-Musiggschdudio aff VST-Dechnologie aafgrüsd, indem i mer neie Software (Cubasis VST 5) und ä neie, exderne Fire Wire Soundkaddn (ESI Quatafire 610) oogschaffd hobb. Etzerd konnd i endlich grouße Samples (> 2 MB) eisetzn und in Echdzeid zum Drägg singer. Neie Musigginschbirazioner hobb i in der Luktung- und Morlam-Musigg grichd, woraf i di Dräggs "Jaidee Luktung", "Monrak" und "Phom Rak Luktung" in meim Schdudio broduzierd hobb. 2004 wår i zum zweidn Mål aff "Rock im Park". Dessmål hodd des Fesdival affm Zebbelinfeld in Nämberch schdaddgfundn, wall des Franggnschdådion zu demm Zeidbungt umbaud worn is. Highlights vom Fesdiväl wårn di Aafdritte von Jet, Wir sind Helden, Sportfreunde Stiller und Red Hot Chili Peppers. Im Jåhr 2007 bin i dann schbondån am driddn Dååch zu "Rock im Park" ganger und hobb mer u.a. di "Kaiser Chiefs" und "Mando Diao" oogschaud. . |
|
2008-2024: In di Jåhr 2008, 2011 und 2014 hobb i mein Summerurlaub aff Ibiza verbrachd, und hobb di welldbekanndn DJs in di gressdn Glubbs Eurobas gsehng. Meine Favoriddn-Glubbs aff Ibiza sinn: Space, Priviledge, Amnesia. Des glennere, abber exglusive "El Divino" hodds blouß nu 2008 gehm, 2011 is di Location scho vom benachbaddn "Pacha" iebernumma worn. 2010, 2012, 2013, 2014, 2015, 2016, 2018, 2019 und 2022 wår i aff Sardinien affn Drum'n'Bass-Fesdiväl "Sun and Bass". 2017 wår i in Groazien aff'm Outlook-Fesdiväl, aans vo di gressdn Bassmusigg-Fesdiväls. Ab 2013 sinn die lokåln Eleggdro-Fesdiväls immer bobulärer worn; desweeng wor i aff "Daycation" in Höchstadt und "Open Beatz" in Herzogenaurach sowie 2016, 2017 und 2022 aff "Burning Beach" am Brombachsee. 2009 und 2010 wor i aff'm aldernadivm Eleggdro-Festival "Klangtherapie" in dä Fränggischn Schweiz, und 2011 auff'm aldernadivm Mini-Fesdiväl "Katz" in Igensdorf. 2015 wor i aff'm grådis-Fesdiväl "Bass am Berg" in Schnaittach. 2012 hobb i mer ä neis Hobby oogschaffd: Beim Thomann hobb i mer ä E-Gidarrn kaffd und hob mer des spülln selber beibrachd. Daraus sinn u.a. di Songs Funk Master, You Are So Mean To Me und By My Side endstandn. Nu dazou hobb i meine Banderfahrungen indensiviert: Vo 2009 bis 2010 hobb i in der Band "Room 4" gschbüllld, und vo 2010-2014 hobb i bei i bei "Probierstein" gschbülld. Zwischndurch hodds 2012/13 aa nu ä Indermezzo bei "Gordon Freeman and his Smashing Railguns" gehm. 2013/14 wår i Bassist in dä Band "Lilly & the Burning Tears". 2019/20 wår i Bassist in dä Blues-Band "Loop'n Blues". Seid 2023 bin i Bassist in dä Hardrock-Band "Blind Men" (A tribute to the early Whitesnake). . |
| >> zur hochdeutschen Version |
| >> zum ultimativen Fränkisch-Kurs |